Yevlax Şəhər İcra Hakimiyyətinin Başçısı şəhid atası Elbəyi Əsgərovu müalicə aldığı xəstəxanada ziyarət edib. Bu barədə Yevlax ŞİH özünün Facebook sosial şəbəkə hesabında paylaşım edib.

Yevlax Şəhər İcra Hakimiyyətinin Başçısı Anar Tağıyev Yevlax rayon Mərkəzi Xəstəxanasında səhhətində yaranmış problemlə əlaqədar əməliyyat olunan, 44 günlük Vətən müharibəsi zamanı şəhidlik zirvəsinə ucalmış Sadiq Əsgərovun atası Əsgərov Elbəyi Məhər oğlunu ziyarət etmiş, səhhəti ilə maraqlanaraq, ona Allahdan şəfa diləmişdir.
Qeyd edək ki, Yevlax rayonunun Nemətabad kəndində doğulan Əsgərov Sadiq Elbəyi oğlu 2020-ci il sentyabrın 27-də başlanan Vətən müharibəsi zamanı Suqovuşan istiqamətində gedən döyüşlərdə qəhrəmancasına şəhidlik zirvəsinə yüksəlmiş, Yevlax şəhər Şəhidlər Xiyabanında dəfn edilmişdir.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıdığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Möhtərəm Prezidentimiz, Müzəffər Ali Baş Komandanımız cənab İlham Əliyevin müvafiq Sərəncamları ilə ölümündən sonra "Vətən uğrunda", "Suqovuşanın azad olunmasına görə" və "Cəsur döyüşçü" medalları ilə təltif olunmuşdur.

Ziyarət zamanı Şəhid atası onlara göstərilən diqqət və qayğıya görə Möhtərəm Prezidentimiz, Müzəffər Ali Baş Komandanımız cənab İlham Əliyevə, Birinci vitse-prezidentimiz hörmətli Mehriban xanım Əliyevaya özü və ailəsi adından minnətdarlıq ifadə etmişdir.

Dialoq.az