21 iyul 2025-ci il tarixdə Yevlax Şəhər İcra Hakimiyyətinin inzibati binasında milli mətbuatımızın yaranmasının 150 illiyinə həsr edilmiş tədbir keçirilib. Tədbirdə Yevlax Şəhər İcra Hakimiyyətinin Başçısı Anar Tağıyev, şəhər icra hakimiyyəti başçısı aparatının məsul şəxsləri, media nümayəndələri iştirak ediblər.
Tədbir Ulu Öndər, Dahi Şəxsiyyət Heydər Əliyevin və torpaqlarımızın azadlığı uğrunda canlarını fəda etmiş qəhrəman Şəhidlərimizin müqəddəs ruhlarının bir dəqiqəlik sükutla yad edilməsi ilə başlayıb.

Tədbiri giriş nitqi ilə açıq elan edən şəhər icra hakimiyyətinin başçısı Anar Tağıyev milli mətbuatımızın yaranmasının 150 illiyi münasibəti ilə bütün media nümayəndələrini ürəkdən təbrik edib, onlara fəaliyyətlərində uğurlar arzulayıb.
Tədbirin gedişində milli mətbuatımızın tarixindən, inkişaf mərhələsindən bəhs edən videoçarx izlənilib. Daha sonra çıxış üçün söz media nümayəndələrinə verilib. Milli mətbuatımızın yaranmasının 150 illiyi ilə bağlı media nümayəndələrinə göstərilən diqqət və qayğıya görə Ölkə Başçısı, Müzəffər Ali Baş Komandan cənab İlham Əliyevə minnətdarlıqlarını bildirən media nümayəndələri milli mətbuatımızın inkişafından, keçdiyi uğurlu yoldan və bu günkü vəziyyətindən danışıblar.

Çıxış edənlər arasında yazıçı, Azərbaycan Yazıçılar və Azərbaycan Jurnalistlər Birliyinin üzvü, "Dialoq.az" xəbər saytının rəhbəri Natiq Əlisoy 3-cü Şuşa Qlobal Media Forumunda Ölkə Rəhbərimiz, Müzəffər Ali Baş Komandan cənab İlham Əliyevin yerli və xarici media nümayəndələri qarşısında etdiyi çıxışları, bu günkü qlobal medianın tələblərini və yerli icra hakimiyyətləri haqqında əsasnamənin 3.14.2.-ci maddəsini rəhbər tutaraq regionlarda informasiyanın azad və keyfiyyətli dövriyyəsinin təmin olunması, innovativ düşüncə, məlumatların sürətli şəkildə axtarılması, əldə edilməsi, istehsalı və yayılması üçün media subyektləri və jurnalistlər ilə qarşılıqlı əməkdaşlıq sahələrində səmərəliliyin, media savadlılığının, informasiya təhlükəsizliyinin artırılması, vətəndaş mövqeyinin və onların problemlərinin, təklif və xahişlərinin real öyrənilməsi, sosial məsələlərin analizi, onların qanunamüvafiq qaydada həlli və bu kimi sualların müzakirəsi, sosial mühitdə baş verən müsbət və mənfi hadisələrin analiz edilməsi üçün regionlarda fəaliyyət göstərən media subyektlərinin, jurnalistlərin və eləcə də müvafiq qurumların ictimaiyyətlə əlaqələr və mətbuat katiblərinin ən azı ayda bir dəfə bir araya gəlməsinin vacibliyini diqqətə çatdırıb.
Tədbirdə iştirak edən media nümayəndələri Azərbaycan milli mətbuatının 150 illik yubleyi və 22 İyul Milli Mətbuat Günü münasibəti ilə fəxri fərmanla təltif ediliblər.
Sonda xatirə şəkilləri çəkilib.

















Dialoq.az