44 günlük Vətən müharibəsinə qədər məkirli düşmənin qoşunlarımızın təmas xətti boyunca (keçmiş işğal edilmiş ərazilərimizdən) təxribatlara əl atması hardasa başa düşülən və qəbul edilən idi. Belə ki, birinci Qarabağ müharibəsindən sonra müvəqqəti üstünlük qazanan, torpaqlarımızı işğal edən düşmən tərəfindən qarşı tərəfi, yəni ordumuzu daima gərginlik altında saxlamaq üçün atılan addım kimi başa düşmək olardı. Ancaq, bu gün düşmənin hər hansı bir təxribata əl atması hərbi əməliyyatdan çox teatr səhnəsinə bənzəyir. Belə ki, 44 günlük müharibədə igidlərimiz tərəfindən "Gecə dərsi" alan düşmən nəinki təxribata, heç təxribat sözünün "T" hərfinə əl atmamalı idi. Düşmənin təxribata əl atması üçün nə gücü, nə iradəsi,nə də döyüş ruhu qalmışdı. Canını birtəhər gəzdirən erməni dığalarında hal qalmışdı ki, hələ bir təxribata da əl atsın? Peşəkar hərbçilər yaxşı bilir ki, məğlubiyyətə uğramış ordunu yenidən komplektləşdirmək, onun döyüş və döyüşə hazırlığını bərpa etmək üçün illərnən vaxt lazımdır. Deməli ilan ulduz görsə də hələ ki, ölməyib, özünü ölülüyə vurub... Hesab edirəm ki, biz qıvrılmış vəziyyətdə kol-kosda gizlənən və qorxusundan onun-bunun üstünə tullanan ilanları yox, o ilanlara zəhər verənləri tapmalıyıq. İkinci bir tərəfdən bir çox rəsmi və qeyri-rəsmi məlumatlara görə düşmənin 2 ədəd S-300 zenit-raket kompleksi məhv edilib. Ordumuz tərəfindən düşmənin 2 ədəd S-300 zenit-raket kompleksinin məhv etməsinə 100 % inanıram, bu mümkündür. Ancaq, o komplekslərin Ermənistana məxsus olmasına 1 % inanmıram...! Burada sual yaranır ki, o komplekslər oraya necə, hansı məqsəd və imkanlarla, hansı yollarla getmişdi? Ermənistanın bir o qədər bol S-300-ü və ya elə pulu var ki? Və o komplekslərin orada, təmas xəttinə, döyüş əməliyyatları gedən əraziyə yaxın məsafədə nə işi var idi? Sonra da 2 ədəd S-300 ZRK ora hansı ağılla qoyula bilərdi ki? Onda belə çıxır ki, ya Ermənistanın həqiqətən başı xarab olub ya da onların əvəzinə başqa başlar düşünür, ancaq səhv düşünür. Ola da bilər ki, KTMT-nin Ermənistanda 2 ədəd S-300-ü ilə düşmənimizin əlini ortaq dostumuz əl altından sıxıb... Bunlar hamısı sadəcə ehtimallardır. Maraqlıdır! Allah Şəhidlərimizə rəhmət eləsin!
_____________________________________________
Yazıçı, hərbi ekspert Natiq Əlisoy