"Dialoq.az" xəbər verir ki, 31 may 2024-cü il tarixində Məktəbəqədər və Ümumi Təhsil üzrə Dövlət Agentliyinin direktorunun müvafiq əmrinə əsasən 13 may 2024-cü il tarixdə Mərkəzi Aran Regional Təhsil İdarəsinin əməkdaşları tərəfindən Ağdaş rayonu Orta Ləki kənd tam orta məktəbində bir neçə istiqamət üzrə aparılmış yoxlama nəticəsində məktəbin direktoru tutduğu vəzifədən azad edilib. Qeyd edək ki, bu barədə Mərkəzi Aran Regional Təhsil İdarəsinin özünün sosial şəbəkə hesabında rəsmi açıqlama verib.

Paylaşımda qeyd olunur:
Məktəbdə ümumi idarəetmə, dərsdənkənar məşğələlərin təşkili və tədrisi, şagird davamiyyəti, dərslərin əvəzolunması, texniki heyət işçilərinin işə davamiyyəti, məktəbdaxili qiymətləndirmənin düzgün aparılmaması ilə bağlı nöqsan və çatışmamazlıqlar aşkar olunduğu üçün Ağdaş rayonu Orta Ləki kənd tam orta məktəbinin direktoru tutduğu vəzifədən azad edilib.
Paylaşımda o da qeyd olunur ki, Mərkəzi Aran Regional Təhsil İdarəsi təhsil müəssisələrində hüquqpozmaların və buna şərait yaradan halların baş verməsini pisləyir, bunun qarşısının alınması, aradan qaldırılması və gələcəkdə bu kimi halların baş verməməsi ilə bağlı idarə tərəfindən təhsil müəssisələrində monitorinq və yoxlamalar davam etdirilir.

Sözügedən məsələ ilə bağlı araşdırma aparmaq və məktəb direktorunun işdən azad olunması ilə bağlı ictimaiyyətə təqdim olunan beş əsas nöqsanı əsaslı və detallı aydınlaşdırmaq, eyni zamanda bununla bağlı ictimaiyyətə dolğun məlumat vermək məqsədi ilə Mərkəzi Aran Regional Təhsil İdarəsi ilə əlaqə saxladıq.

Mərkəzi Aran Regional Təhsil İdarəsinə ünvanladığımız sualları sizlərə təqdim edirik:
1. Məktəbdə ümumi idarəetmə üzrə konkret hansı nöqsanlar olub?
2. Dərsdənkənar məşğələlərin təşkili və tədrisi, şagird davamiyyəti hansı tarixdən-hansı tarixə qədər olub və şagird davamiyyətsizliyinin əsas səbəbi nə olub?
3. Dərslərin əvəzolunmasının səbəbi və məqsədi nə olub?
4. Texniki heyət işçilərinin işə davamiyyətsizliyi konkret hansı texniki işçilər olub (ad, soyadlar) və səbəb nə olub?
5. Məktəbdaxili qiymətləndirmənin düzgün aparılmaması ilə bağlı aşkar olunan nöqsan və çatışmamazlıqlar hansı səbəbdən olub? Eyni zamanda sadalanan nöqsanlarla bağlı məktəb direktorundan başqa kimlər cəzalandırılıb?

Ünvanladığımız suallara münasibət bildirən Mərkəzi Aran Regional Təhsil İdarəsinin İnzibati təşkilat sektorunun aparıcı məsləhətçisi Rüstəm Aslanov qısa olaraq bildirdi ki, təəssüflər olsun ki, biz sözügedən məsələ ilə bağlı ictimaiyyətə ətraflı məlumat verə bilmirik.
Sözügedən məsələ ilə bağlı qarşı tərəfin fikirlərini dinləməyə və işıqlandırmağa hazırıq.

Dialoq.az