Müqəddəs Ramazan ayı münasibətilə ölkəmizin hər yerində olduğu kimi, Yevlax şəhərində də xeyirxah və mənəvi dəyəri yüksək təşəbbüslər həyata keçirilir. Bu qəbildən olan növbəti tədbir 11 mart 2026-cı il tarixində keçirilib.
Belə ki, Azərbaycan Təhsil İşçiləri Azad Həmkarlar İttifaqının Yevlax Şəhər Komitəsinin sədri Əfsanə müəllimənin təşəbbüsü və təşkilatçılığı ilə Yevlax təhsil işçiləri arasında olan şəhid ailələri, qazilər və müharibə veteranları üçün iftar süfrəsi təşkil olunub. Mənəvi dəyəri yüksək olan bu tədbir birlik, həmrəylik və ehtiram mühitində baş tutub.

Tədbirdə şəhid ailələri, qazilər, müharibə veteranları və təhsil ictimaiyyətinin nümayəndələri bir masa arxasında toplaşaraq müqəddəs Ramazan ayının mənəvi ab-havasını birlikdə bölüşüblər. İftar süfrəsi yalnız dini mərasim deyil, həm də Vətən uğrunda canından keçən şəhidlərin əziz xatirəsinə ehtiramın, onların ailələrinə diqqət və qayğının bir daha nümayiş etdirilməsi baxımından böyük əhəmiyyət daşıyıb.

Qeyd olunub ki, şəhid ailələrinə, qazilərə və müharibə veteranlarına diqqət və qayğı göstərilməsi dövlətimizin həyata keçirdiyi sosial siyasətin mühüm istiqamətlərindən biridir. Bu siyasət ölkə rəhbərliyi tərəfindən daim diqqətdə saxlanılır və cəmiyyətin bütün təbəqələri tərəfindən dəstəklənir. Məhz bu yanaşma nəticəsində cəmiyyətimizdə milli həmrəylik, vətənpərvərlik və mənəvi birlik daha da möhkəmlənir.
Tədbirin təşkilatçısı olan Əfsanə müəllimənin təşəbbüsü isə bir daha göstərir ki, o, rəhbərlik etdiyi kollektivlə birlikdə üzərinə düşən vəzifələri məsuliyyətlə yerinə yetirən, sosial həssas qruplara diqqət və qayğı göstərməyi daim prioritet sayan nümunəvi rəhbərlərdən biridir. Onun təşkilatçılığı ilə həyata keçirilən bu cür tədbirlər Yevlax təhsil ictimaiyyətində böyük rəğbətlə qarşılanır.

Şəhid ailələri, qazilər və müharibə veteranları onlara göstərilən diqqət və ehtirama görə tədbirin təşkilatçılarına minnətdarlıqlarını bildiriblər. Belə mənəvi dəyəri yüksək təşəbbüslər cəmiyyətimizdə həmrəyliyin və qarşılıqlı hörmətin daha da güclənməsinə xidmət edir.

Sonda tədbir iştirakçıları bu xeyirxah təşəbbüsə görə Əfsanə müəlliməyə, onun rəhbərlik etdiyi kollektivə və tədbirin təşkilində əməyi keçən hər kəsə təşəkkürlərini ifadə edərək bildiriblər ki, şəhid ailələrinə, qazilərə və müharibə veteranlarına göstərilən diqqət hər zaman yüksək qiymətləndirilir və böyük minnətdarlıq hissi ilə qarşılanır.

Uca Allah xalqımızı və dövlətimizi qorusun, Vətənə sədaqətlə xidmət edən insanları daim ucaltsın.

.

.

.

.

.

.

.

.


Natiq Əlisoy
Yazıçı, jurnalist, Azərbaycan Yazıçılar və Azərbaycan Jurnalistlər Birliyinin üzvü