Mingəçevir Dövlət Universitetində (MDU) universitetin struktur bölmə rəhbərləri və bir qrup əməkdaşının iştirakı ilə işgüzar görüş keçirilib.
Tədbirdə çıxış edən Mingəçevir Dövlət Universitetinin rektoru Anar Eminov universitetin cari fəaliyyət istiqamətləri, qarşıda duran prioritet vəzifələr və strateji inkişaf hədəfləri barədə danışıb. Rektor bildirib ki, müasir ali təhsil sistemində uğurun əsas şərtlərindən biri idarəetmədə çeviklik, əməkdaşlar arasında səmərəli kommunikasiya və nəticəyönümlü fəaliyyət prinsipinin təmin edilməsidir.
Görüş zamanı struktur bölmələrin iş planlarının icra vəziyyəti müzakirə olunub, görülən işlər təhlil edilərək qarşıdakı dövr üçün əsas hədəflər müəyyənləşdirilib. Rektor Anar Eminov qeyd edib ki, universitetin inkişaf strategiyası yalnız sənədlərdə deyil, gündəlik fəaliyyətin bütün mərhələlərində öz əksini tapmalı, hər bir əməkdaş bu prosesdə öz məsuliyyətini dərindən dərk etməlidir.
Rektor akademik və inzibati proseslərin daha sistemli təşkili, sənədləşmə mədəniyyətinin təkmilləşdirilməsi, tapşırıqların vaxtında və keyfiyyətli icrası, eləcə də daxili koordinasiyanın gücləndirilməsinin vacibliyini vurğulayıb. O bildirib ki, tələbəyönümlü yanaşmanın genişləndirilməsi, əməkdaş məmnunluğunun artırılması və sağlam iş mühitinin formalaşdırılması universitet rəhbərliyinin əsas prioritetləri sırasındadır.
Görüşdə həmçinin rəqəmsal idarəetmə imkanlarının genişləndirilməsi, xidmət keyfiyyətinin artırılması, innovativ yanaşmaların tətbiqi və resurslardan səmərəli istifadə ilə bağlı fikir mübadiləsi aparılıb.
Sonda Anar Eminov vurğulayıb ki, Mingəçevir Dövlət Universitetində şəffaf, təşəbbüskar, çevik və nəticəyönümlü idarəetmə modelinin daha da gücləndirilməsi istiqamətində işlər davam etdiriləcək və hər bir əməkdaşın fəaliyyəti universitetin ümumi inkişafına, akademik mühitinə və institusional nüfuzuna mühüm töhfə verəcəkdir.

.

.

.

.

Dialoq.az