Müasir ədəbiyyatımızın inkişafında gənc yazarların rolu mütləqdir. Bu istiqamətdə hər bir qələm adamı səylə çalışmalıdır. Ancaq bu o demək deyil ki, hər yetən əlinə qələm alıb yazmalıdır. Sözsüz ki, dünən olduğu kimi bu gün də yaxşı yazan şairlərimiz, yazıçılarımız var. Lakin bunların sayı o qədər azdır ki, söz oğurluğu ilə məşğul olan, sözün çəkisini, onun bədii yükünü bilməyən "qələmqazan"lar içərisində canlarını zornan gəzdirirlər. Beləliklə, yazılan yaxşı əsərlər, şeir nümunələri itib-batır. Məsələnin digər tərəfi isə tarixən şair və yazıçılarımıza cəmiyyət arasında xüsusi hörmət bəslənsə də, bu gün bu ənənə demək olar ki, yox səviyyəsindədir. Hətta elə məqamlar olur ki, şairləri "bekar adam"lar da adlandırırlar... Bir millətin, bir dövlətin tarixi ilə bərabər onun milli ədəbiyyatının, mədəniyyətinin olmasını anlamayan və anlamaq istəməyən dayazdüşüncəli insanlara isə bunu anlatmaq çox çətindir!
Natiq Əlisoy