Türkiyənin Bodrum şəhərində yerləşən hotellərdən birində qidadan zəhərlənmə hadisəsi baş verib.

Dialoq.az xəbər verir ki, hadisə Bodrumun Ortakent bölgəsindəki hotellərdən birində qeydə alınıb. İlkin məlumata görə, 25 turist yedikləri qidadan sonra özlərini pis hiss edib.

Zərərçəkənlər ürəkbulanma, qusma və mədə ağrısı şikayətləri ilə xəstəxanaya çatdırılıblar. Turistlərin bir qismi tibbi yardım üçün özləri müraciət edib, digərlərinə isə hotel rəhbərliyi tərəfindən köməklik göstərilib.

Həkimlərin müayinəsindən sonra turistlərin vəziyyətinin qənaətbəxş olduğu, həyatları üçün təhlükə olmadığı bildirilib. Hazırda onların müalicəsi davam etdirilir.

İlkin araşdırmalara əsasən, zəhərlənmənin hotel restoranında təqdim olunan toyuq ətindən qaynaqlana biləcəyi ehtimal edilir. Faktla bağlı polis araşdırma aparır.

Qeyd edək ki, bu, Türkiyədə son günlərdə baş verən ilk belə hadisə deyil. Daha əvvəl Kuşadasında yerləşən beşulduzlu hotellərdən birində də “hər şey daxil” sistemi ilə təqdim olunan yeməklərdən zəhərlənən 30-a yaxın turist xəstəxanaya yerləşdirilmişdi.
Dialoq.az