Azərbaycan Respublikasının Elm və Təhsil Nazirliyinin təşəbbüsü ilə 44 günlük Vətən müharibəsinin iştirakçısı, Azərbaycan Bayrağı ordenli zabit, müharibə veteranı Mədəd Süleymanovun həyat və döyüş yolunu əks etdirən xüsusi qəhrəmanlıq stendi hazırlanaraq təhsil aldığı Yevlax şəhəri Şəhid Qənbər Məhərrəmov adına 4 saylı tam orta məktəbdə yerləşdirilib.

Bu təşəbbüs dövlətin Vətən uğrunda şərəflə xidmət etmiş hərbçilərə göstərdiyi yüksək ehtiramın və diqqətin daha bir nümunəsi kimi dəyərləndirilir. Belə bir stendin yaradılması təkcə bir şəxsin xidmətlərinin qiymətləndirilməsi deyil, eyni zamanda Azərbaycanın ərazi bütövlüyü uğrunda döyüşmüş bütün qəhrəman oğullarımıza verilən dəyərin ifadəsidir.
Qeyd edək ki, Mədəd Süleymanov Azərbaycan Respublikasının ərazi bütövlüyü uğrunda aparılan 44 günlük Vətən müharibəsində qəhrəmancasına iştirak edib. O, göstərdiyi şücaətə görə Azərbaycan Respublikasının yüksək dövlət təltiflərindən olan Azərbaycan Bayrağı ordeni ilə yanaşı, “Füzulinin azad olunmasına görə”, “Qubadlının azad olunmasına görə”, “Şuşanın azad olunmasına görə” medalları və “Vətən müharibəsi iştirakçısı” medalı ilə təltif olunub.
Məktəbdə yaradılan stend Mədəd Süleymanovun keçdiyi şərəfli döyüş yolunu, qazandığı uğurları və dövlət tərəfindən verilən yüksək təltifləri əks etdirir. Bu isə şagirdlərə qəhrəmanlıq, vətənpərvərlik və dövlətçilik dəyərlərinin aşılanması baxımından xüsusi əhəmiyyət daşıyır.

Belə təşəbbüslər gənc nəslin milli ruhda tərbiyə olunmasına, Vətənə sevgi hissinin gücləndirilməsinə və qəhrəmanlarımızın həyat yolunun gələcək nəsillərə örnək kimi təqdim edilməsinə xidmət edir. Xüsusilə təhsil müəssisələrində yaradılan qəhrəmanlıq guşələri və stendlər şagirdlərin tariximizi daha yaxından öyrənməsinə, dövlətimiz və ordumuz haqqında dolğun məlumat əldə etməsinə imkan yaradır.
Mədəd Süleymanovun təhsil aldığı məktəbdə onun adına qəhrəmanlıq stendinin yaradılması yüksək qiymətləndirilməli hadisədir. Bu, dövlətin və cəmiyyətin qəhrəman hərbçilərimizin xidmətlərinə verdiyi önəmin, onların şərəfli fəaliyyətinə göstərilən hörmət və ehtiramın bariz nümunəsidir.
Bu cür təşəbbüslərin davamlı olması həm qəhrəmanlarımızın xatirəsinin yaşadılmasına, həm də gənclərin vətənpərvərlik ruhunda formalaşmasına mühüm töhfə verir. Azərbaycan gəncliyi məhz belə nümunələrdən ilham alaraq Vətənə, dövlətə və xalqa sədaqət ruhunda yetişir.

Natiq Əlisoy
Yazıçı-şair, Azərbaycan Yazıçılar Birliyinin və Azərbaycan Jurnalistlər Birliyinin üzvü