Azərbaycan xalqının çoxəsrlik dövlətçilik ənənələri tarix boyu müstəqillik ideyasına sarsılmaz sədaqətini nümayiş etdirmişdir. Azərbaycanın şanlı tarixinə daxil olan 28 may 1918-ci il Azərbaycan Xalq Cümhuriyyətinin yaradılması günüdür.

Müstəqilliyimiz qürur mənbəyimizdir. Bü gün Azərbaycan tarixinin ən mühüm günlərini yaşayır. Azərbaycan, zenginlikləri və dəyərləriylə bütövdür. 28 May – Müstəqillik Günü Azərbaycan tarixində ən əlamətdar günlərdən biridir. Azərbaycan xalqı XX əsrin əvvəllərində mövcud tarixi şəraiti dəyərləndirərək müsəlman Şərqində ilk demokratik, hüquqi dövlətini qurdu. Cümhuriyyət bizlərin ən böyük sevdası, küllərindən yenidən doğuşunun nişanəsdir. Müstəqillik Günü xalqımızın azadlıq ruhunun, milli birliyinin və dövlətçilik iradəsinin rəmzidir. 28 Mayda milli dövlətçilik tarixinin ən önəmli hadisəsi olan Azərbaycan Xalq Cümhuriyyətinin yaranmasının 108-ci ili tamam olur. 28 May – Müstəqillik Günü: Azərbaycan xalqının azadlıq iradəsinin, dövlətçilik ənənələrinin və milli birliyinin təntənəsidir.Müstəqillik Günü milli ruhun tərcümanı və milli mübarizə əzminin mübarək əsəridir. 28 May -Müstəqillik Günü elə bir tarixi andır ki, küllərindən yenidən doğub və müqəddəs iradəsiylə bir millətin istiqlal addımı və istiqbal hərəkətidir. 108 il bundan əvvəl 1918-ci il mayın 28-də Azərbaycan Xalq Cümhuriyyətinin yaradılması ölkəmizin, millətimizin həyatına böyük tarixi hadisə kimi daxil oldu. Azərbaycan Xalq Cümhuriyyətinin qurulmasının 108-ci il dönümünü millətcə yad və idrak edirik. Cümhuriyyətimiz istiqlalı uğrunda fədakarca çırpınan millət ruhunun görkəmli bir mükâfatı, milli iradənin möhtəşəm bir əsəridir. 108 il əvvəl pak və parlaq keçmişin ilhamıyla, imanının gücüylə, milli ruhun iradəsiylə çətin yollardan keçilərək Cümhuriyyət elan olunmuşdur. Cəmi 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərmişdir. Cümhuriyyət, zülmə meydan oxuyan, zalıma rəst çəkən Məhəmməd Əmin Rəsulzadənin nəslinin emanətidir. Azərbaycan Xalq Cümhuriyyəti Azərbaycanın dövlət və ictimai xadimi, siyasətçi və publisist, Azərbaycan Xalq Cümhuriyyətinin (1918-1920) banilərindən və Azərbaycan siyasi mühacirətinin liderlərindən Azərbaycan tarixinin görkəmli şəxsiyyətlərindən olan Məhəmməd Əmin Axund Hacı Molla Ələkbər oğlu Rəsulzadə və müstəqilliyimiz uğrunda mübarizə edən qəhrəmanlarımızın əsəridir. Bu gün Azərbaycan Xalqı böyüklüyünə yaraşır bir şəkildə ilərləməsinə davam etməktədir. Tarix yaşanır, yaddaş isə yaşadır. Yaddaşımız olmazsa tarix də olmaz. Tarix, insanın meyvəsidir yaddaş isə ruhun. Bu gün hər sahədə güclənən uğurları diqqətlə izlənən və dünyada hörmət qazanan bir Azərbaycan görmənin xoşbəxtliyini yaşayırıq. Azərbaycanın gəldiği demokratik, siyasi ve iqtisadi səviyyə hədəflərimizə hər keçən gün daha da yaxınlaşdığımızın işarətidir. Məhəmməd Əmin Rəsulzadə, Azərbaycan Xalq Cümhuriyyətinin İstiqlal Hərəkatının ideoloqu, İstiqlalını elan edən Milli Şuranın Sədri, Siyasətçi, Görkəmli dövlət xadimidir. İstiqlal hissini daşıyan bütün millətlər üçün, ölməz bir simvoldur. Bir milletin böyüklüyünün təməl daşını təşkil edən, özünə inanan və dayanma duyğusunu vermişdir. Dövlətimiz, millətimiz qazandıqlarından, dayandığı əsas və dəyərlərdən güc alaraq ilələbəd payidar qalacaqdır. Müsəlman Şərqində ilk demokratik cümhuriyyətin məhz Azərbaycan torpağında yaranması xalqımızın o dövrdə və o illər ərəfəsində — XIX əsrin sonunda və XX əsrin əvvəllərində milli müstəqillik, azadlıq duyğuları ilə yaşaması ilə bağlıdır. O illərdə xalqımızın qabaqcıl şəxsiyyətləri, mütəfəkkir adamları, ziyalıları xalqımızda milli azadlıq, milli müstəqillik duyğularını gücləndirmiş, milli dirçəliş, milli oyanış əhval-ruhiyyəsi yaymış və bunların hamısı məntiqi olaraq 1918-1920-ci illərdə 23 ay ərzində mövcud olan və müsəlman Şərqində ilk dünyəvi, demokratik dövlət kimi tarixə düşən Azərbaycan Xalq Cümhuriyyətinin siyasi varisidir.

Ümummilli Lider Heydər Əliyev dəfələrlə bildirirdi ki, biz bu gün demokratik Azərbaycan dövlətini qururuqsa, ayağa qaldırırıqsa, bunu Xalq Cümhuriyyətinə borcluyuq. Azərbaycan Xalq Cümhuriyyətinin tariximizdəki yeri və roluna xüsusi qiymət verən Azərbaycan xalqının ümummilli lideri Heydər Əliyev deyirdi: «Biz ilk Demokratik Cümhuriyyətin yaranması gününü əziz tutaraq, onu Azərbaycanın dövlət müstəqilliyi günü — Respublika Günü elan etmişik və bu, bizim milli bayramımızdır». Bu gün Azərbaycan Respublikasının Prezidenti cənab İlham Əliyevin rəhbərliyi ilə Azərbaycan Respublikasında demokratik, hüquqi, dünyəvi dövlət, vətəndaş cəmiyyəti quruculuğu prosesi, siyasi, iqtisadi və sosial islahatlar uğurla həyata keçirilir, ölkə iqtisadiyyatı dönmədən inkişaf etdirilir, əhalinin sosial müdafiəsinin gücləndirilməsi üçün əsaslı tədbirlər görülür. Azərbaycan tarixi bir çox şərəfli və eyni zamanda sınaqlarla dolu mərhələlərdən keçmişdir. Bu mərhələlərin ən mühüm və dönüş nöqtəsi olan 28 May 1918-ci il, xalqımızın yaddaşında müstəqillik, azadlıq və milli özünüdərkin təcəssümü kimi yaşayır. Həmin gün tarixə Azərbaycan Xalq Cümhuriyyətinin elan edilməsi ilə daxil olmuş və xalqımızın dövlətçilik salnaməsində yeni bir səhifə açılmışdır. Məhz bu tarix Azərbaycan xalqının uzun əsrlər boyu arzuladığı, lakin siyasi və geosiyasi səbəblərdən əldə edə bilmədiyi müstəqilliyin gerçəyə çevrildiyi gündür. 28 May- Azərbaycan Respublikasının Müstəqillik Günü - milli qürur, siyasi iradə və demokratik ənənələrin başlanğıc nöqtəsi kimi dəyərləndirilir.Müstəqillik hər bir xalqın və millətin tarixi inkişaf yolunda ən ali məqsədlərindən biri və milli kimliyinin əsas təşkiledici amilidir. Bu anlayış yalnız dövlət atributlarının - bayraq, gerb və himnin - mövcudluğu ilə məhdudlaşmır, daha çox milli suverenliyin hərtərəfli təzahürüdür. Müstəqillik, xalqın öz gələcəyini özü müəyyən etmək, daxili və xarici siyasətini sərbəst şəkildə formalaşdırmaq, milli mədəni irsini, dilini və ənənələrini qoruyub inkişaf etdirmək bacarığı və müqəddəs hüququdur. Həqiqi müstəqillik siyasi yetkinlik, güclü iqtisadi bazis, müstəqil hüquqi sistem və xalq iradəsinin dövlət idarəçiliyində tam əks olunması ilə təmin edilir. Tarixi təcrübə göstərir ki, müstəqilliyin əldə edilməsi uğrunda mübarizə qədər onun qorunması və möhkəmləndirilməsi də böyük məsuliyyət tələb edir - bu proses daimi diqqət, milli birlik, strateji düşüncə və gələcək nəsillərə qarşı vəzifə şüuru tələb edir. Azərbaycan tarixinin 1918 və 1991-ci illərdəki müstəqillik dövrləri sübut edir ki, həqiqi müstəqillik yalnız formal atributlarla deyil, milli maraqların hərtərəfli qorunması, dövlətçilik ənənələrinin inkişafı və vətəndaşların bu dəyərlərə sadiqliyi ilə əldə edilir. Azərbaycan xalqı bu məsuliyyəti ilk dəfə olaraq 1918-ci ildə öz üzərinə götürmüşdür. Çar Rusiyasının süqutu və Qafqazda yaranmış siyasi qeyri-müəyyənlik fonunda xalqımız müstəqil dövlət qurmaq imkanını dəyərləndirmiş və Azərbaycan Xalq Cümhuriyyəti elan edilmişdir. 28 May 1918-ci ildə Tiflisdə qəbul edilən İstiqlal Bəyannaməsi ilə Azərbaycan müsəlman Şərqində ilk parlamentli respublika kimi beynəlxalq aləmə təqdim olundu. AXC demokratik idarəetmə prinsiplərinə əsaslanaraq, hüquq bərabərliyi, seçki azadlığı, qadınlara səsvermə hüququ və digər islahatlarla qısa müddətdə nümunəvi bir dövlət modelinə çevrilmək yolunda mühüm addımlar atdı. Bu tarixi hadisə yalnız Azərbaycan üçün deyil, bütövlükdə Şərq xalqları üçün bir ilk və ilham mənbəyi oldu. Baxmayaraq ki, Azərbaycan Xalq Cümhuriyyəti cəmi 23 ay fəaliyyət göstərdi, onun ideyaları və qoyduğu hüquqi-siyasi əsaslar sonrakı dövrdə- xüsusilə 1991-ci ildə dövlət müstəqilliyimizin bərpası zamanı mühüm istinad nöqtəsinə çevrildi. Azərbaycan Respublikasının bu günkü dövlətçiliyi məhz AXC-nin varisi kimi formalaşmış və inkişaf etməkdədir. 28 May tarixinin Müstəqillik Günü kimi qeyd olunması isə təkcə keçmişin deyil, eyni zamanda bu günün və gələcəyin də müstəqil düşüncə tərzi üzərində qurulmasının rəmzidir.Azərbaycan Xalq Cümhuriyyətinin (AXC) yaranması XIX əsrin sonu — XX əsrin əvvəllərində Qafqaz və ümumilikdə Şərqi Avropada baş verən mürəkkəb siyasi proseslərin və milli oyanış hərəkatlarının məntiqi nəticəsi idi. Bu dövrdə çar Rusiyasının zəifləməsi və 1917-ci il Fevral və Oktyabr inqilablarından sonra imperiyanın süqutu Qafqaz xalqları üçün öz müqəddəratını təyin etmək imkanları yaratdı. Belə bir şəraitdə azərbaycanlı ziyalılar və siyasi liderlər milli dövlətçiliyin bərpasını məqsəd kimi qarşıya qoydular.1917-ci ilin sonlarında yaranmış Zaqafqaziya Seymi və ardınca qurulan Zaqafqaziya Demokratik Federativ Respublikası çox keçmədən dağılmağa başladı. Bu siyasi boşluqdan istifadə edərək 1918-ci il 28 may tarixində Tiflisdə fəaliyyət göstərən Azərbaycan Milli Şurası Azərbaycanın müstəqilliyini elan etdi. İstiqlal Bəyannaməsində «Azərbaycan Xalq Cümhuriyyəti müstəqil bir dövlət olaraq Qafqazın cənub-şərqində yaranmışdır» cümləsi ilə müstəqilliyin hüquqi-siyasi əsası qoyuldu. Bu sənəd Azərbaycan tarixində ilk dəfə olaraq xalq hakimiyyəti, vətəndaş bərabərliyi və demokratik dəyərlərin dövlət quruluşunda əsas prinsip kimi qəbul olunduğunu təsdiqlədi.Azərbaycan Xalq Cümhuriyyəti özünün mövcud olduğu 23 ay ərzində dövlət quruculuğu sahəsində əhəmiyyətli addımlar atdı. 1918-ci ilin iyununda Gəncə müvəqqəti paytaxt elan olundu, çünki Bakı hələ də daşnak-bolşevik qüvvələrinin nəzarətində idi. Avqust ayında isə dövlət orqanlarının təşkili sürətləndirilərək Nazirlər Şurası və ayrı-ayrı nazirliklər fəaliyyətə başladı. Sentyabrın 15-də Bakının Qafqaz İslam Ordusu tərəfindən azad edilməsindən sonra hökumət mərkəzi Gəncədən Bakıya köçürüldü. AXC-nin həyata keçirdiyi mühüm islahatlar arasında ilk parlamentin yaradılması xüsusi əhəmiyyət daşıyır. 1918-ci il dekabrın 7-də açılan Azərbaycan Parlamentində müxtəlif partiyalar və milli azlıqlar təmsil olunurdu. Bu, demokratik pluralizmin və dözümlülüyün göstəricisi idi. Qısa müddətdə AXC tərəfindən təhsil sisteminin yenidən qurulması istiqamətində də əhəmiyyətli işlər görüldü. 1919-cu ildə Bakı Dövlət Universitetinin təsis edilməsi bu sahədə atılan mühüm addımlardan biri oldu. Eyni zamanda milli ordu quruculuğu sahəsində də ciddi işlər görüldü, nizami hərbi hissələr yaradıldı və milli təhlükəsizliyin təmininə səy göstərildi. Xarici siyasət sahəsində isə Azərbaycan hökuməti beynəlxalq tanınma istiqamətində ardıcıl fəaliyyət göstərmişdir. 1919–1920-ci illərdə Paris Sülh Konfransında Azərbaycan nümayəndə heyətinin fəaliyyəti nəticəsində 1920-ci ilin yanvarında Antanta dövlətləri Azərbaycanı de-fakto tanıdı. Bu tanınma beynəlxalq hüquq baxımından böyük uğur sayılırdı. Lakin Azərbaycan Xalq Cümhuriyyətinin ömrü uzun olmadı. Sovet Rusiyasının imperiya ambisiyaları və geosiyasi maraqları nəticəsində 1920-ci il aprelin 28-də Azərbaycan Xalq Cümhuriyyətinin fəaliyyəti zor gücünə dayandırıldı və ölkə sovetləşdirildi. Buna baxmayaraq, AXC-nin qoyduğu ideoloji, hüquqi və siyasi irs Azərbaycan xalqının yaddaşında yaşamağa davam etdi və 1991-ci ildə müstəqilliyin bərpası zamanı mühüm istinad nöqtəsinə çevrildi.Azərbaycan Xalq Cümhuriyyəti öz dövrünü xeyli qabaqlayan ideallara söykənən, demokratik və hüquqi dövlət modelinin təməlini qoyan, qısaömürlü, lakin dərin iz buraxmış bir dövlət idi. Onun fəaliyyəti göstərdi ki, xalqımız dövlət qurmaq, onu idarə etmək və beynəlxalq aləmdə layiqli yerini tutmaq qabiliyyətinə malikdir.1918-ci ildə yaradılmış Azərbaycan Xalq Cümhuriyyəti cəmi 23 ay fəaliyyət göstərməsinə baxmayaraq, xalqımızın azadlıq iradəsinin simvoluna çevrildi. Hər nə qədər sovet imperiyasının tərkibinə daxil edilmə Azərbaycan xalqının siyasi müstəqilliyinə son qoysa da, milli dövlətçilik ideyası yaddaşlardan silinmədi. 1991-ci ildə SSRİ-nin dağılması ilə yaranmış tarixi şərait Azərbaycan xalqına növbəti dəfə öz taleyini müəyyənləşdirmək imkanı verdi və beləliklə, 18 oktyabr 1991-ci il tarixində Azərbaycan Respublikasının dövlət müstəqilliyi bərpa edildi. Bu, həm də 1918-ci ildə yaradılmış Azərbaycan Xalq Cümhuriyyətinin varisliyi prinsipinin bərpası və onun ideallarının davamı demək idi.Azərbaycanın 1991-ci ildə müstəqilliyini bərpa etməsi ilə ölkənin qarşısında həm tarixi fürsətlər, həm də misilsiz çətinliklər dururdu. 1991-1993-cü illər Azərbaycan dövlətçiliyi üçün sınaq illəri oldu — bir tərəfdən Sovet imperiyasının dağıntıları, digər tərəfdən isə yeni qurulan dövlət qurumlarının zəifliyi ölkəni dərin böhrana sürüklədi. Bu dövrdə Ermənistanın hərbi təcavüzü nəticəsində Qarabağ və ətraf rayonların işğalı, 1 milyondan çox vətəndaşımızın məcburi köçkün vəziyyətinə düşməsi milli birlik və dövlətçilik ideyalarımız üçün ağır sınaq yaratdı. İqtisadi sahədə isə istehsalın kəskin azalması, inflyasiya, yoxsulluq və enerji çatışmazlığı gənc respublikanın gələcəyini təhlükə altına alırdı.Bu kritik məqamda ümummilli lider Heydər Əliyevin 1993-cü il iyunun 15-də hakimiyyətə qayıdışı Azərbaycan tarixində dönüş nöqtəsi oldu. Onun dövlətçilik təcrübəsi və uzaqgörən siyasəti sayəsində ölkədə sabitlik bərpa edildi.

Ümummilli lider Heydər Əliyevin ilk addımlarından biri 1994-cü ildə atdığı tarixi qərar — «Əsrin müqaviləsi» oldu ki, bu da Azərbaycanın enerji resurslarını dünya bazarına çıxarmaqla iqtisadi müstəqilliyin əsasını qoydu. Eyni zamanda, o, güclü mərkəzləşdirilmiş dövlət quruculuğuna keçid edərək, konstitusiya islahatları həyata keçirdi və 1995-ci ildə yeni Konstitusiyanın qəbulunu təmin etdi. Ümummilli lider Heydər Əliyevin dövründə Azərbaycanın müstəqilliyi yalnız formal deyil, həqiqi məzmun qazandı. Onun «Balaca dövlət olmaq istəmirik» prinsipi əsasında beynəlxalq münasibətlər sahəsində uğurlu siyasət yürüdülməyə başlandı. 1997-ci ildə GUAM-ın təsis edilməsində fəal iştirak, NATO ilə əməkdaşlığın genişləndirilməsi və BMT Təhlükəsizlik Şurasında işğal altındakı torpaqlarımızla bağlı qətnamələrin qəbulu bu siyasətin nəticələri idi.Müstəqilliyin həqiqi mənasını əks etdirən ən mühüm amillərdən biri də milli ordunun qurulması oldu. Ulu Öndər Heydər Əliyevin «Biz öz torpağımızı özümüz azad edəcəyik» prinsipial mövqeyi nəticəsində hərbi islahatlar başladıldı və 2000-ci illərdə Azərbaycan Ordusu regionun ən güclü ordularından birinə çevrildi.2003-cü ildən bəri Prezident İlham Əliyevin rəhbərliyi altında Azərbaycanın müstəqillik kursu yeni keyfiyyət səviyyəsinə qalxaraq, ölkəmiz regionda və dünyada nüfuzlu dövlət kimi mövqeyini möhkəmləndirmişdir. Bu dövrdə həyata keçirilən dərin iqtisadi islahatlar, o cümlədən qeyri-neft sektorunun inkişafı, kənd təsərrüfatının modernləşdirilməsi və xarici investisiyaların cəlb edilməsi sayəsində Azərbaycan iqtisadi müstəqilliyini gücləndirmişdir. Bakı-Tbilisi-Ceyhan, Bakı-Tbilisi-Qars, Şimal-Cənub nəqliyyat dəhlizi kimi strateji layihələr ölkəmizi beynəlxalq tranzit mərkəzə çevirmiş, «Böyük Qayıdış» strategiyası çərçivəsində Qarabağ və Şərqi Zəngəzudda genişmiqyaslı bərpa-quruculuq işləri həyata keçirilmişdir. 2020-ci il 44 günlük Vətən müharibəsində qazanılan tarixi qələbə Azərbaycanın hərbi gücünü və dövlət iradəsini bütün dünyaya nümayiş etdirmiş, torpaqlarımızın işğaldan azad edilməsi ilə ölkəmizin ərazi bütövlüyü bərpa olunmuşdur. Sosial sahədə yoxsulluğun azaldılması, əmək bazarının inkişafı, gənclər siyasətinin və təhsil sisteminin modernləşdirilməsi kimi uğurlar Azərbaycan vətəndaşlarının rifah səviyyəsini əhəmiyyətli dərəcədə yüksəltmişdir. Beynəlxalq arenada isə Azərbaycanın BMT Təhlükəsizlik Şurasına üzv seçilməsi, Qeyri-Sərhəd Avropa Hərəkatında fəal iştirakı və çoxsaylı beynəlxalq təşkilatlarda nüfuzlu mövqe tutması müstəqil dövlət kimi nüfuzumuzu daha da artırmışdır. Bu nailiyyətlər sübut edir ki, Azərbaycanın müstəqilliyi yalnız formal deyil, hər sahədə özünü doğruldan real suverenlikdir. Hazırda Azərbaycan müstəqil, güclü və beynəlxalq arenada etibarlı tərəfdaş kimi tanınan bir dövlətdir. Azərbaycanın BMT, ATƏT, Avropa Şurası, İslam Əməkdaşlıq Təşkilatı və Qoşulmama Hərəkatı kimi nüfuzlu təşkilatlarla əməkdaşlığı, beynəlxalq enerji və nəqliyyat layihələrində iştirakı ölkənin qlobal siyasətdə aktiv və müstəqil aktor kimi çıxış etdiyini sübut edir.2021-ci ildə Azərbaycan Respublikasının Prezidenti cənab İlham Əliyevin sərəncamı ilə 28 Mayın rəsmi dövlət bayramı statusu yenidən bərpa edildi və bu qərar Azərbaycanın milli dövlətçilik ənənələrinə sadiqliyinin ən parlaq nümayişi oldu. Hər il bu tarixdə ölkə miqyasında təntənəli tədbirlər keçirilir: Fəxri Xiyabanda dövlət rəhbərliyinin iştirakı ilə Azərbaycan Xalq Cümhuriyyətinin qurucularının məzarına çələng qoyulması, Azərbaycan Dövlət Akademik Milli Dram Teatrında xüsusi tədbirlər, «İstiqlal» muzeyində tarixi sərgilər və «Şuşa» uvertürası ilə Azərbaycan Dövlət Simfonik Orkestrinin xüsusi konserti təşkil olunur. Müstəqillik Günü münasibətilə hər il Prezidentin iştirakı ilə təntənəli qəbul keçirilir, şəhərlərimizdə xalq şənlikləri və bayram konsertləri təşkil edilir, xüsusi ilə gənclər üçün «Müstəqillik yürüşü» kimi tədbirlər həyata keçirilir. 2023-cü ildə bayram çərçivəsində ilk dəfə olaraq «Müstəqillik meşəsi» layihəsinin başlanması, həmçinin bütün ölkə ərazisində «Azadlıq nəğmələri» festivalının keçirilməsi yeni ənənələr yaratmışdır. Bu tədbirlər nəinki milli birlik ruhunu gücləndirir, həm də gənc nəslin vətənpərvərlik ruhunda tərbiyə olunmasına xidmət edir, eyni zamanda diasporumuz tərəfindən dünyanın 50-dən çox ölkəsində eyni vaxtda keçirilən «Dünya azərbaycanlılarının müstəqillik yürüşü» ilə də Azərbaycanın müstəqillik ideyalarını beynəlxalq səviyyədə təbliğ edir. Beləliklə, Azərbaycan Respublikasının Müstəqillik Günü — 28 May tarixi yalnız bir bayram deyil, xalqımızın azadlıq iradəsinin, milli özünüdərkinin və müasir dövlətçilik ənənələrinin simvoludur. 1918-ci ildə Azərbaycan Xalq Cümhuriyyətinin yaranması ilə əsrlər boyu müxtəlif imperiyaların tərkibində yaşamış bir xalq ilk dəfə olaraq demokratik prinsiplərə əsaslanan suveren dövlət qurdu. Bu dövlət, hər nə qədər qısa müddət fəaliyyət göstərsə də, müstəqillik və xalq hakimiyyəti ideyasını Azərbaycan xalqının siyasi şüuruna həkk etdi. 1991-ci ildə SSRİ-nin süqutundan sonra bərpa olunmuş müstəqillik, əslində, Azərbaycan Xalq Cümhuriyyətinin hüquqi və ideoloji varisliyinin bərpası idi. Bu müstəqillik xalqın yaddaşında məhz 28 May ruhu ilə qidalanır və müasir dövlətçilik fəlsəfəsində öz əksini tapır. Son otuz ildə Azərbaycan Respublikası müstəqilliyin qorunması və möhkəmləndirilməsi, suverenliyinin təmin olunması, milli maraqlarının müdafiəsi və regional liderliyə yüksəlmək istiqamətində mühüm uğurlar əldə edib. Azərbaycan xalqı tarix boyu azad yaşamaq uğrunda mübarizə aparmış, öz suverenliyinə sahib çıxmaq üçün saysız-hesabsız çətinliklərə sinə gəlmişdir. Bu baxımdan, 28 May tarixi yalnız keçmişin xatırlanması deyil, eyni zamanda gələcəyə yönəlmiş bir strateji baxışdır. Bu gün gənc nəsil həmin tarixdən dərs almalı, dövlətçiliyimizin qorunmasını və inkişafını özünün ali vətəndaşlıq borcu kimi qəbul etməlidir. 28 May Müstəqillik Günü Azərbaycanın milli qürur günüdür. Bu gün, eyni zamanda, tarixə verilən dəyərin, dövlətçilik ənənələrinin yaşadılmasının və gələcək nəsillərə ötürülməsinin təntənəsidir.

2020-ci ildə Vətən müharibəsində qazanılan tarixi Qələbə xalqımızın gücünü və birliyini bütün dünyaya nümayiş etdirdi. Prezident, Müzəffər Ali Baş Komandan İlham Əliyevin rəhbərliyi ilə torpaqlarımız işğaldan azad edildi və üçrəngli bayrağımız Qarabağda və Şərqi Zəngəzurda yenidən dalğalandı. Bu gün Şuşada, Laçında, Xankəndidə dalğalanan bayrağımız Azərbaycan Xalq Cümhuriyyətinin ideallarının yaşadığını və xalqımızın öz tarixi torpaqlarına sahib çıxdığını göstərir.
Azərbaycan daim xoşbəxt, müvəffəqiyyətli, zəfərli olacaq, yaşayacaq və yaşadacaqdır. Azərbaycan əbədiyyətə qədər var olacaq və tam müstəqil yaşayacaq. Ulu öndər Heydər Əliyev tərəfindən qorunub saxlanılan müstəqilliyimiz bu gün Azərbaycan Respublikasının Prezidenti cənab İlham Əliyevin rəhbərliyi ilə daha da möhkəmləndirilir və onun əbədiliyi təmin edilir. Var olsun müdrik Prezidentimiz! Var olsun Azərbaycan xalqı! Var olsun Azərbaycan Ordusu! Bu gün Azərbaycan xalqının hər bir fərdi Sizinlə fəxr edir və millətimiz Prezidentimizə, Ali Baş Komandan cənab İlham Əliyevə minnətdarıq! Bütün bunlar bir daha deməyə əsas verir ki, Azərbaycanın müstəqilliyi əbədi və dönməzdir. Dövlət Müstəqilliyi Günü hər bir azərbaycanlı üçün sadəcə təqvim tarixi deyil, azad yaşamaq hüququnun, milli birliyin və gələcəyə inamın təntənəsidir. Müstəqil Azərbaycan hər birimizin qürur mənbəyidir. Müstəqillik ən böyük dəyərimiz və sərvətimizdir. Xalqımız qanı-canı bahasına əldə etdiyi bu sərvəti əzmlə qoruyur və əbədi qoruyacaq. Azərbaycanın müstəqilliyi əbədidir, dönməzdir! Hər bir Azərbaycan vətəndaşı üçün bu tarix sadəcə bir gün deyil, kimliyimizin, iradəmizin və dövlətimizə olan sədaqətin rəmzidir. Mənəviyyat abidəsi olan əcdadlarımıza Allahdan rəhmət diləyirəm. Milli mübarizədə, yaxın və ya uzaq tariximizdə vətənimiz, millətimiz və bayrağımız ücün şəhid olmuş bütün qəhrəmanlarımıza Allahdan rəhmət diləyirəm. Ruhları şad olsun!
Qarabağ Azərbaycandır!

s.e.f.d., dos. Murtəza Həsənov
Azərbaycan Respublikasının Prezidenti yanında Dövlət İdarəçilik Akademiyasının Siyasi İdarəetmə fakültəsinin dekanı
Dialoq.az