"Dialoq.az" xəbər verir ki, Yevlax şəhərində daha iki küçə Mirzə Şəfi Vazeh və 28 May küçələri asfaltlanıb. Əlbəttə, şəhərin küçələrində asfalt örtüyünün yenilənməsi və ya əvvəllər asfalt olmayan küçələrin asfaltlanması sakinlərin rahatlığı üçün olduqca vacibdir. Şəhərin küçələrinin abad və rahat olması hər bir şəhər sakininin haqlı arzusu və tələbidir.
Şəhərdə aparılan müsbət işlər şəhər sakinləri kimi bizləri də sevindirir.

Lakin aparılan işlərdən sonra küçələrdə yerləşən kanalizasiya lüklarının ətrafının standartlara uyğun olmaması görülən işlərə müəyyən qədər kölgə salır. Belə ki, gördüyünüz kimi çəkilən asfaltdan sonra kanalizasiya lüklarının çökəklik formasında qalması avtomobillərin hərəkəti zamanı ciddi təhlükə yarada, nəqliyyat vasitələrinə ziyan vura və qəza riskini artıra bilər.

Ümid edirik ki, bu çatışmazlıqlar qısa zamanda aradan qaldırılacaq və asfaltlanma işləri şəhərin digər küçələrində də, xüsusilə şəhər mərkəzindən kənar küçələrdə də davam etdiriləcək.
Ümumilikdə görülən işlərə görə zəhməti keçən hər kəsə təşəkkür edirik.