ADY sərnişindaşıma göstəricilərini açıqlayıb.

2026-cı ilin yanvar-may aylarında Azərbaycan Dəmir Yolları QSC (ADY) ilə səfər edən sərnişinlərin sayı artıb.

Dialoq.az xəbər verir ki, bu barədə Azərbaycan Dəmir Yolları QSC məlumat yayıb.

Bildirilib ki, cari ilin ilk beş ayında ADY ötən ilin eyni dövrü ilə müqayisədə 16 faiz daha çox sərnişin daşıyıb. Belə ki, hesabat dövründə dəmir yolu nəqliyyatından ümumilikdə 4,5 milyondan çox sərnişin istifadə edib.

Məlumata görə, yanvar-may aylarında Abşeron dairəvi dəmir yolu ilə 4,3 milyona yaxın sərnişin daşınıb ki, bu da ötən ilin müvafiq dövrü ilə müqayisədə 16 faiz artım deməkdir. Rayonlararası marşrutlarla isə təxminən 240 min sərnişin səfər edib və bu göstərici 21 faiz artıb.

Qeyd olunub ki, eyni dövrdə ADY-nin xidmətlərindən istifadə edən xarici turistlərin sayı da artaraq 11 min nəfəri ötüb. Bu göstərici ötən ilin eyni dövrü ilə müqayisədə 6 faiz çoxdur.
Dialoq.az