Alimlər müəyyən ediblər ki, qara çayın müntəzəm istifadəsi orqanizmə müsbət təsir göstərir və sağlamlığın qorunmasına kömək edir. Dünyada milyonlarla insanın gündəlik istehlak etdiyi qara çay düşündüyümüzdən daha çox fayda verə bilər. Yeni elmi araşdırmalar bu içkinin sağlamlığın bir neçə mühüm sahəsinə eyni zamanda müsbət təsir göstərdiyini təsdiqləyib.

Dialoq.az xəbər verir ki, tədqiqatlara görə, qara çayın müntəzəm qəbulu ağız boşluğunun sağlamlığının qorunmasına kömək edir.

Geniş yayılmış fikrin əksinə olaraq, qara çay diş ərpinin yaranmasını artırmır, əksinə onun azalmasına şərait yaradır. İçkinin tərkibində olan polifenollar diş minasını zədələyən və kariyesə səbəb olan bakteriyaların çoxalmasını zəiflədir.

Alimlər qara çayın ürək-damar sisteminə təsirinə də xüsusi diqqət ayırıblar. Məlum olub ki, gündə azı üç fincan qara çay içən insanlarda insult riski xeyli aşağı olur. Mütəxəssislərin hesablamalarına görə, bu risk təxminən 20 faiz azalır. Maraqlıdır ki, yaşıl çay bu baxımdan daha zəif təsir göstərir.

Qara çayın tərkibindəki antioksidantlar hüceyrə səviyyəsində orqanizmin qorunmasında mühüm rol oynayır. Polifenollar alkoqol, siqaret tüstüsü və zərərli kimyəvi maddələrin təsiri nəticəsində yarana bilən DNT zədələnmələrinin qarşısını almağa kömək edir. Oxşar maddələr meyvə və tərəvəzlərdə də mövcuddur və həkimlər onları gündəlik qidalanmaya daxil etməyi tövsiyə edirlər.

Bundan əlavə, qara çay onkoloji xəstəliklərin profilaktikasında da potensial amil kimi qiymətləndirilir. Antioksidantlar və katexinlərin birgə təsiri bəzi xərçəng növlərinin yaranma riskini azalda bilər. Xüsusilə araşdırmalar göstərir ki, qara çayı müntəzəm içən qadınlarda yumurtalıq xərçəngi daha az müşahidə olunur.

Mütəxəssislər vurğulayırlar ki, qara çayın faydası əsasən ölçülü və davamlı istifadə zamanı, ümumi sağlam həyat tərzi ilə birlikdə özünü göstərir.
Dialoq.az