11 fevral 2026-cı il tarixində Yevlax rayonunda fermerlər üçün kartof, yerkökü, kələm və soğan əkini ilə bağlı maarifləndirici və təşkilati görüş keçirilib.


Dialoq.az xəbər verir ki,görüşdə sözügedən məhsulların əkilməsi və becərilməsi, dövlət tərəfindən göstərilən maddi dəstək mexanizmləri, eləcə də istehsal olunan məhsulların rahat və davamlı şəkildə satışa çıxarılması üçün tədarük sisteminin qurulması məsələləri müzakirə olunub. Bildirilib ki, layihədə iştirak etmək istəyən fermerlər əvvəlcədən qeydiyyatdan keçməklə prosesə cəlb ediləcəklər.

Tədbir Kənd Təsərrüfatı Nazirliyinin Aqrar Tədarük və Təsərrüfat Yarmarkalarına Nəzarət şöbəsinin rəhbər şəxsləri, Yevlax Dövlət Aqrar İnkişaf Mərkəzinin direktoru və Kənd Təsərrüfatı Nazirliyi yanında Yevlax Fermerlər Şurasının sədrinin iştirakı ilə keçirilib.

Rəsmi şəxslər fermerlərə dövlət proqramları çərçivəsində yaradılan imkanlar, subsidiya mexanizmləri, məhsul tədarükü və satış bazarlarına çıxış yolları barədə ətraflı məlumat veriblər.

Qeyd olunub ki, Kənd Təsərrüfatı Nazirliyinin dəstəyi ilə Yevlax fermerləri üçün məhsulların satışını asanlaşdıran şərait yaradılacaq. Fermerlər əkdikləri kartof, soğan, yerkökü və kələmi tədarük məntəqələrinə qarşılıqlı qiymət razılaşması əsasında rahat şəkildə təhvil verə biləcəklər.

Tədbir çərçivəsində fermerlərin sualları cavablandırılıb, onların təklifləri dinlənilib və gələcəkdə qarşılıqlı əməkdaşlığın gücləndirilməsinin vacibliyi vurğulanıb.

Dialoq.az